الاثنين، 2 مارس، 2009

خيبة الامل












اعزائى




هل انتم ممن يقال عنهم اصحاب قرار .....ام...انتم ممن تفضلون العوم على عوم الآخرين؟؟؟؟

مجرد سؤال استفزازى .. !! ولكن مع الاسف الاجابة بعد استعراض المثال المطروح للمناقشة ح تخليكم تحسوا بخيبة الامل اللى راكبة جمل .... !! مع المعذرة على المثال الغير مهذب!!

بالرغم ان الله سبحانه وتعالى قد ميز الانسان بسمة العقل والتدبير ..الا انه ما زال هناك من يسلك سلوك ونهج القطيع حتى وان قاده هذا الى التهلكة ...!!

والقضية المطروحة امامكم اليوم يا سادة يا كرام هى .. قضية الدروس الخصوصية


ومش عارف ليه الموضوع ده دائما ما يثيرحفيظتى بالرغم من انقطاع الروابط بينى وبينه من زمن ليس ببعيد


تعالوا ندخل فى الموضوع ونستعرض معا النبرة الحالية والعالية التى تقول ..

العيال لازم وحتما يأخذوا دروس خصوصية .. مش كدة وبس.. لااااااااا.. وفى كل المواد ..!!


صحيح شر البلية ما يضحك.. طيب انتم نسيتوا زمان كنا بنقول ان اللى بيأخذ دروس خصوصية ده تلميذ فاشل ..وخايب !! و يمكن ده عشان كان فى هذا الوقت حاجة اسمها تعليم بحق...ووزارة اسمها التربية والتعليم .. ومدرسين افاضل افذاذ .. وطلبة عارفين كيف السبيل الى النجاح بالمجهود الفردى .. والثقة بالنفس وبدون اى نوع من التدخل الاسرى ..الذى قد يحدث فى اضيق نطاق ممكن .. (ده زمان)

يعنى من الآخر
و بهذا المنظور السابق .. يكون مقياس الطالب الفاشل اليوم هو الاجتراء على هجر الدروس الخصوصية والاعتماد على النفس وكمان تحقيق النجاح وبتفوق ..!


طبعا الكلام ده مش ح يعجب قاعدة عريضة من الناس ..!

وح يقولوا... ياعم ارحمنا !!

انت عايز تضيعنا وتضيع العيال ؟؟؟..

ده المدرسين لو شموا خبر ح يتربصوا ليهم فى اعمال السنة ويخلوها سنة كحلى علينا كلنا ...!!

اذن .. هى الحكاية كدة!!!

طيب اسمحوا لى ان اتكلم واعرض وجهة نظرى التى قد تعجب البعض وقد لاتعجب البعض الآخر .. معلش مضطرين تستحملونى !!!

كلام الاخوة المعترضين من وجهة نظرى عايز قاعدة و اعادة نظر!! ولو فكرنا شوية حنعرف انه ليس له أى اساس من الصحة.. وكل الحكاية اننا فعلا لغينا عقولنا وعومنا على عوم غيرنا ومشينا وراء القطيع ونحن فى قمة السعادة والحبور.. سعادة وصلت لدرجة التباهي كأن تقول ام لزميلتها " والله ده كريم ابنى بيأخذ دروس فى كل حاجة حتى الكومبيوتر" .. بالذمة ده كلام ..!! من اين لنا بالوقت والجهد والمال !! وحتى ان توافرت كل هذه العوامل ؟؟ اين دور الطالب وفرصته فى الاعتماد على نفسه؟ .. وما هى محصلة هذا الشعور بعد سنوات من الدراسة ؟.. ولماذا يذهب اطفالنا الى المدارس اذن .. اياكم ان تقولوا عشان يتعلموا ... !! ما احنا عرفنا اللى فيها خلاص!

ممكن نقول انهم فى منتزه للهو وتضييع الوقت حتى يعود الابوين من اعمالهما ويلتقى الجميع ليبدأ اليوم الدراسي الحقيقي بالدروس الخصوصية مع مزيد من الاستنزاف لوقت الاسرة ومدخراتها وراحتها ..!!

انا بقول الحمد لله انه مازالت هناك بعض الاسر الواعية التى تصر وبشدة على ان يعتمد اولادهم على انفسهم وخصوصا فى المراحل الاولى من عمرهم .. مع قليل من الاشراف الاسرى ومتابعة غير لصيقة .. ومساعدة اذا لزم الامر ..!!

على فكرة .. تشجيعنا للدروس الخصوصية بدون وعى وتروى قد يكون السبب الحقيقى لمزيد من الخسائر..فى الوقت اللى احنا فى اشد الحاجة الى بناء كيان وشخصية اولادنا.. وبيان مدى قدرتهم على شق طريقهم فى الحياة والنجاح ...

قد يحتاج الامر الى وقت و جهد "غير مهدر بالطبع" من جانبنا.. ولكن الا يستحق اولادنا وفلذات اكبادنا هذا التعب ... وهذا المجهود والرعاية من اجل حياة افضل .. والا يشيرهذا التسابق بيننا من اجل مزيد من الدروس الخصوصية الى مدى تردى التعليم وتراجع المدرسين عن اداء واجبهم المفروض عليهم .. ومعالجة الاباء لهذه الاخطاء بمزيد من الدروس الخصوصية... لقد تغير مفهوم التعليم واصبح هناك اتفاق غير معلن بين الجانى والضحية على الاستمرار فى هذه المهزلة... ولسوف يحصد الابناء ما زرعه الاباء ..

دعونا لا نستسلم ونحاول .. ولتكن الدروس الخصوصية شر لابد منه عند الضرورة فقط... بل وفى اضيق نطاق.. مع متابعة ملموسة منا لجدواها .. والا فلتذهب الى مصيرها المحتوم بعيدا عنا وعن اولادنا .


احتاج الى رأيكم حتى وان كان فى الاتجاه المعاكس !!

هناك 53 تعليقًا:

Sweet Violet يقول...

انا الصراحه من زماااان مبحبش الدروس الخصوصيه ابدااااا و اخواتى بردو كده

لان الصراحه بسمى الدروس الخصوصيه هى اللى ضياع للوقت مش الذهاب للمدرسه

و انا معاك طبعا ان المفروض الكل يقف فى وش اللى بيحصل

لكن فى اهالى بيخافوا على ولادهم من كتر اللى بيشفوا من تعامل المدرسين للطلاب

يعنى تخيل مدرس ابتدائى يهدد التلاميذ ان اللى مش هياخد درس عنده هيسقط

و لو ولى الامر راح المدرسه و اتكلم .. يبدأ الاضطهاد للتلميذ . و امتحانات الشهر تيجى نازل فيها .. اعمال السنه تبقى مافيش اصلا .. و محدش بيحاسب المدرس على كده

بيبقى ولى الامر مغصوب وقتها ان يعطى لابنه درس عند المدرس علشان يراعى ضميره (ده اين كان لسه فى ضمير)

يعنى المسأله مش اولاياء الامور اكتر من انها المنظمة كلها عايزة اعادة من الاول

salma mohamed يقول...

انا مع حضرتك في حاجات وحاجات
انا عن نفسي ما اول سنه اخدت فيها درس هي الاعدادية وكنت باخد درسين رياضيات وانجليزي,واخر السنه اخدت مراجعة علوم وعربي,
واولى ثانوي 3 دروس,اما الثانوية فكنت باخد في كله,
ايه السبب مش حبا فيها بالعكس طول عمري كنت من المتفوقين من غيرها وكان فيه بركة في الوقت,ولكن للاسف مفيش مدرسين بيشرحوا فعلا والمدرس اللي بيشرح نادر والطلبة بتلغوش على الشرح لانهم عارفين الكلام مسبقا,
طيب يعني الطالب هيفهم ازاي,الواحد كان بيشتري كتب خارجية تساعده بس ساعات كتير بنبقى محتاجين حد فعلا يشرح طيب الطالب يعمل ايه؟
يعني العيب مش من الطلبة ولا اهاليهم المشكلة فيهم كلهم
اي المدرسين والمسؤولين عن الوزارة وعن المدارس,والاهالي والطلبة,
وطول ما في خلل في حاجه منهم يبقى عمر الامر ما هيستقيم,
يعني هي حلقة مفرغة.

iBRAHiM sAllAm يقول...

بصراحة موضوع الدروس ده معقد ,
الطلبة دلوقتي بقوا مش بيروحوا المدارس أصلا !!

بصراحة الحل في وجهة نظري :

مدرسة خاصة محترمة , هدفع فيها كتير , بس اللي هدفعه فيها مرة واحدة هدفعه في الدروس متفرقا !!

ده إذا خلفت يعني و بقى عندي عيال لا قدر الله ,

تحيتي :)

Sweet Violet يقول...

استاذى الفاضل بجد كنت سعيده جدااا اليوم بمعرفتك عن قرب

انا جيت اوفى بوعدى و جبت لينك المدونة اللى قولت لحضرتك عليها (:

http://maddodo.blogspot.com/

بنت القمر يقول...

طيب امسك كده كتاب رابعة ابتدائي للحساب لو ما احتجتش شرح ومساعدة خارجية قولي ونكمل نقاش:)))))))))

الازهرى يقول...

كان لى حوار مع احد الطلبة بعد شكوى من والده بعدم مذاكرته
وعندما سألته طلب منى ان يحكى لى واحكم
ففوجئت بانه يخرج فى الثامنة صباحا الى المدرسة ويعود فى الثانية او الثالثة ليتناول غداؤه سريعا ثم يبدأ مرحلة الدروس وهى ليست فى منزله بل على نطاق واسع من المدينة فينتقل من منزل هذا المدرس فى جنوبها الى الاخر فى شمالها وهكذا حتى ينتهى من دروسه فى المساء
فيعود الى المنزل
ووجه الى سؤالا صغيرا
ما الذى تتوقعه منى بعد تلك الرحلة ؟
فأجبته النوم

ولا تعليق

موجة يقول...

السلام عليكم ورحمة الله وبركاتة
انا مبسوطة جدا انى عرفت حضرتك ومبسوطة اكتر انى شوفت شخصية محترمة جميلة زى حضرتك
اما بالنسبة لموضوع الدروس الخصوصية
فده موضوع مش محتاج اراءنا بس
ده كمان محتاج لخطوة ايجابية
والمفروض كل واحد يبتدى بنفسة ويمنع اولاده من الدروس
ولو بصينا شوية بدقة هنلاقى ان مدرسين الدروس الخصوصية لهم برضو اولاد وبرضو بيعانو من موضوع الدروس ده
يعنى المدرس قبل مايكون مدرس هو اب لاسرة
واكيد طالما مدرس يبقى من محدودين الدخل
يعنى الحال على قده
والمفروض بقى يرحمو نفسهم ويرحمو غيرهم
اسفة للاطالة

Sharm يقول...

دروس خصوصية ؟؟

ياااااااااه فكرتنى بأيام زمان

كيــــــــــــارا يقول...

المشكله مش في كدا الكلا م دا كان زمان

انا هعرض مثالين هيقولوا المشكله ايه

المثال الاول ام متخرجه من كليه تجاره والمفروض انها متعلمه مش عارفه تعلم طفلتها ازاي تقرا وتكتب وبتوديها لمدرسه وطبعا الطفله مش بتستجيب واتخانق اقول موديه بنت في كي جي وان لمدرسه امال لما تكبر هتعملي ايه

المشكله في الحكايه دي هي الام مش الطفله ولا المدرسه يبقي كدا محتاجين حمله توعيه للامهات

********

الحكايه التانيه بنت ذكيه وامها بتهتم جدا بيها وهي في اولي اعدادي ومش محتاجه دروس لان امها بتزاكرلها والبنت شاطره وبتستجيب يجي مدرس الانجليزي يضربها بالعصايا علي صوابعها والسبب انه لمحها بتتكلم وطبعا دا مش حصل بس عشان مش موافق تاخد عنده درس وبينزلها في امتحان الشهر ولما الام عملت شكوي وخلوا مدرس تناي صحح الامتحان كان فيه فرق 10 درجات شايلهم المدرس الاولاني وكل دا عشان يجبر البنت علي انها تدخل درس

وفي الحكايه دي يبقي اللي محتاجينه صحوه ضمير لكل مدرس ونقول ان المدرس كاد ان يكون رسولا لانه حامل للعلم ورساله بيقدها

*********

نيجي بقي للعيال اللي هي اصلا لا نافعه بمذاكره ولا بدروس

هنقول المشكله فين

المشكله في التاسيس اللي مش اتاسس في الصغر صعب اوي نعدله في الكبر

الموضوع اكبر وله فروع كتيره


يووووووه رغيت برده


كل سنه وانت طيب

كيــــــــــــارا يقول...

توضيح انا اقصد بمدرسه معلمه

Habiba يقول...

اولا اولا من غير زعل والله اسفه للتأخير وماينفعش خالص حكايه ولا خلاص بقى اللى اتقالتلى دى امممممم

انا رايى اللى مقدرتش اقوله يوم الحفله وكمان كنت تعبانه ومقدرتش اكتبه هو ان الموضوع فى تلات جوانب بتشترك فيه

الاول هو المدرس اللى بقى مش فارق معاه يشرح والمدرسه بالنسبه ليه وقت بيضيع وبياخد عليه مرتب وخلاص واهو كده كده العيال بتاخد دروس ومش فارقه معاها

والتانى هو الطالب اللى بقى بيقول المدرس مش بيشرح كويس فى المدرسه وانا مش هينفع اعمل حاجه لوحدى وعنده عقيده انه لو ذاكر لوحده مش هيجيب حاجه وان الدرس هو اللى بينجح وعلشان كده بقت عنده قناعه انه لا مدرسه فارقه ولا مذاكره فارقه الدروس هى الحاجه الوحيده اللى فارقه

والتالت هو اولياء الامور اللى فيهم الطبقه اللى بتفكر فى ان الدروس الخصوصيه شياكه وبرستيج وانا هدى ابنى درسين فى الماده الواحده علشان الناس تقول عليا بنت ناس -وايه علاقه ولاد الناس بالدروس مش عارفه!!-

وفى منهم اللى بيعمل كده لانه فعلا بيبقى خايف على ابنه لانه عارف برضو ومتأكد ان المدرسه مش بتشرح كفايه وبصراحه ممكن يكون هو مش فاضى او بينفض علشان مش يتعب نفسه مع ولاده وبيقول ادفع فلوس واريح دماغى وخلاص

وبصراحه اوقات بشوف ان الطلبه واولياء الامور عندهم حق فى موضوع الدروس لان فى تقصير جامد من المدرسين اللى بيخافوا اساسا يشرحوا فى المدراس بعدين العيال مش تاخد دروس وهما يتخرب بيوتهم !!!!

لو هتسألنى عنى انا وعن وجهة نظرى وعقيدتى فى الموضوع ده هقولك بكره الدروس اساسا وطول عمرى مش بحبها بس كنت باخدها فى ثانوى عون ليا مش اكتر وحتى الكليه فيروس الدروس منتشر عندنا اوى اوى فيها الا انى اخدت عهد على نفسى انى انجح وبتفوق كل سنه وبدون درس واحد فى اى ماده على مدار ال5 سنين بتوع الجامعه واعتقد انى نجحت فى ده والحمد لله :)

ادعيلى بقى يتموا الشهرين الباقيين على خير
سلام ياوالدى ياغالى :)

Habiba يقول...
أزال المؤلف هذا التعليق.
Habiba يقول...

نسيت اقول لحضرتك ان الموضوع بقى دايره مقفوله مش تتفتح ونقدر نخرج منها الا اذا اتغيرت ثقافتنا من اول الطالب لحد المدرس وولى الامر

الموضوع عايز عمل فورمات للدماغ الموجوده لدى الفئات الثلاث وتنزيل operating system جديد يشتغل بفكر صح مش فكر متخلف


كده بقى وبعد الكومنت الطويييل ده عرفت انا كنت مكسله ليه ؟؟ :)

وميض ابتسامة يقول...

عزيزتى Sweet Violet

اتفق معك فى محاولات بعض المدرسين لاجبار التلاميذ على الدروس الخصوصية وبأستخدام اسلوب تهديدى مباشر لا يقبل الشك .. وهؤلاء قد يكونوا قلة ..وهذا امل مطلق والا ستصبح كارثة .. وغالبا ما تحدث فى مدارس الشعب (اقصد الحكومية)
اما المدارس الخاصة ..فحدث ولا حرج وسوف اتناول الموضوع لاحقا
اما عن خوف الاهالى على ابنائهم فهو فى معظم الاحيان خوف عام وغير منطقى بالمرة
ولو تريثوا قليلا لكان لهم شأن آخر
تحياتى واشكرك على اللينك ولقد اسعدنى تعرفى على شخصك الودود والمحترم

وميض ابتسامة يقول...

العزيزة سلمى

بعد قراءة تعليقك .. اعتقد ان المشكلة تكمن فى ازمة ضمير مستحكمة فى نفوس الاخوة والاخوات المدرسين بصفة عامة .. حيث اغفلوا واجبهم تجاه تلاميذهم .. وقرروا فيما بينهم ان المدرسة للراحة والمرح والغاوى ينقط بطاقيته .. وبعد المدرسة تحلى الدروس الخصوصية والعداد يشتغل والاستوب ووتش
وسلم لى على الضمير والمبادىء
بصراحة الله يكون فى عون الطلبة...لانهم مش شايفين اى حلول امامهم غير الحل ده!
خالص تحياتى ياسلمى وشكرا على المشاركة...

وميض ابتسامة يقول...

عزيزى ابراهيم سلام

طبعا ربنا يديك وتدخل اولادك احسن المدارس واغلاها .. لكن يمكن يكون ده حل لايقدر عليه الجميع ..
وانا معاك ان معظم المدارس ذات الصيت والغنى بتشترط على مدرسيها عدم اعطاء دروس خصوصية والا كان مصيرهم الرفد والتسريح .. حيث يعتمد الطلبة تماما على شرح المدرسين بالفصل والمتابعة ولا شىء غير ذلك
عموما نتمنى لك انجاب مزيد من الانجال المحظوظين

وميض ابتسامة يقول...

عزيزتى بنت القمر

قادتنى الظروف مؤخرا لشرح احد مسائل الرياضة لطفل فى الصف الخامس الابتدائى لغات .. وحيث انى من محبى الرياضة بصفة عامة الا انى صدمت من قسوة المنهج والغازه المحيرة واشفقت على عقول الصغار
من هذا المنهج .. وتذكرت وقتها طلبك بالنظر الى كتاب سنة رابعة ابتدائى للحساب .. وبدون النظر اليه فأنا اصدقك تماما ان هناك مأساة اخرى كامنة فى هذا المنهج ...
والسؤال .. هل يستوعب اطفالنا وبسهولة هذه المناهج ..؟ لا اظن!!
اتذكر عندما تغيرت المناهج وادخلت الرياضة الحديثة .. واستشارنى نجلى فى احد المسائل الرياضية انى عجزت عن فهم الموضوع .. فذهبت الى احد اصدقائى العباقرة فى هذا الفرع وطلبت منه ان يشرح لى وبأسهاب هذا الدرس حتى اتمكن من شرحه والتمكن منه .. وقد كان!
ولكن هل يفعل كل اولياء الامور مافعلت ام يستسلمون نظرا لضيق الوقت والقهر المدرسى والحاح الابناء بأخذ الدروس الخصوصية ..
شكرا وارجوا سماع رأيك ....

وميض ابتسامة يقول...

العزيز الازهرى

مأساة يعيشها من اسلم زمامه للدروس الخصوصية ... ماذا ننتظر من طالب يعود لمنزله ليلا بعد ان قضى كل وقته فى التنقل من منزل الى اخر ليحصل على دروسه الخصوصية .. طبعا ارهاق وتبلد ونوم عميق .. وعندما يصحو يبدأ يوم جديد من المعاناة
واقترح على والديه ان يكتفوا بالدروس الخصوصية وان تلغى المدرسة تماما حتى يجد الوقت الكافى للمذاكرة
مجرد اقتراح
عزيزى الموضوع مرهق .. واتمنى ان نصل الى مجرد انصاف حلول ..
تحياتى واهلا بك وشكرا للمشاركة

وميض ابتسامة يقول...

عزيزتى موجة

اشكرك كثيرا على اطرائك .. وانا اكثر سعادة لمعرفة ابناء محترمين مثلك ...
اما عن رأيك فى ضرورة تذكر المدرسين ان لهم ابناء يعانون من صعوبة المناهج وعدم شرح مدرسيهم لهم بذمة وبالتالى احتياجهم لدروس ترهقهم وترهق اسرتهم نظرا لاستنزاف موارد الاسرة المالية وكذلك وقتها..
فأنا اعتقد ان المدرسين لا يدرون بهذا الامر .. ولا يؤرقهم اطلاقا كون ابنائهم يعانون طالما ان العداد شغال ولسان حالهم يقول وايه يعنى ما يأخدوا دروس خصوصية هم كمان ...
ويمكن انا غلطان وهناك من يراعى ضميره
عموما اشكرك للمشاركة واهلا بك صديقة دائمة وسوف ازورك قريبا بمدونتك

وميض ابتسامة يقول...

العزيز شارم

اهلا بك وبمشاركتك ... واتمنى ان اعرف الى اى مدى تم تذكيرك بالدروس الخصوصية لعلنا نستفيد من تجربتك
شكرا وفى انتظار ردك ..

لحظة تأمل يقول...

اولا اعتذر عن التاخير
ثانيا احييك كقا على موضواعاتك

اما الدروس الخصوسية فهى كارثة نساعد جميعا فى انتشارها
ولكنها منظومة ان تربى الطفل منذ الصغر على الاعتماد على النفس
وان يبذل الاباء بعض الجهد فى متابعة ابناءهم فى الاستذكار
وان يراعى المدرسين ضمائرهم ليقوموا بواجبهم كاملا فى المدرسة

دائرة واسعة لا نستطيع انتقاص عنصر منها كى تكتمل

ترى كم من الوقت نحتاج كى تكتمل؟؟

دمت بخير..تحياتى

mohamed ghalia يقول...

أستاذى
أنا بجد زعلان لأأنك كنت فى حفلة توقيع أنا انثى ومتعرفتش على حضرتك
إن شاء الله ملحوقة فى لقاء جاى
دمت فى سعادة

وميض ابتسامة يقول...

عزيزى كيارا

اشكرك اولا لمشاركتك الفعالة مع ابراز نماذج مختلفة متعلقة بالدروس الخصوصية
والنموذج الاول المتعلق بالام خريجة التجارة انا شايف انه لا ضرر من ذهاب البنت لمدرسة حتى وان كان للتعليم ولكن المطلوب من الام هو المتابعة اللصيقة للابنة فى هذه المرحلة ومساعدتها بقدر الامكان حتى تستطيع ان تعبر خطوات التعليم الاولى بنجاح وحب للتعليم .. وهذا مهم جدا

اما عن طالبة الاعدادية الشاطرة وحكايتها مع مدرس الانجليزى فهذا نوع من انواع انعدام الضمائر السائدة عند بعض المعلمين ويمكن علاجه بالشكوى كمافعلت والدة الفتاه والتى اثمرت عن ظهور حقيقة الامر مما يضع المعلم معدوم الضمير فى موقف لا يحسد عليه .. وهذا موقف بطولى من الام المصرة على مصلحة ابنتها المتفوقة بمجهودها ومساعدة البيت ..

اما عن عن الطلبة الغير مؤسسين اصلا منذ البداية فهذه غلطة مروعة من الاباء الغير مدركين لخطورة الموقف على مستقبل اولادهم .. فهم كالعمارة المبناه بلا اساس .. حتما سوف تقع اجلا او عاجلا ....

شكرا ياكيارا .. وانا برضه رغيت ومفيش حد احسن من حد ... لكن انت احسن

وميض ابتسامة يقول...

ابنتى العزيزة حبيبة

بصراحة انا استمتعت جدا بعرضك للمشكلة وجوانبها من كافة الوجوه واقترابك الواضح من مواطن الضعف المتمثل فى البديات بصفة عامة .. وكيفية علاجها بدأ من المدرسة .. حتى اولياء الامور والطلبة
طبعا انا متفق معاك فى ان المناورات التى يقوم بها المعلمين على حساب الطلبة وعدم توصيل المعلومة من اجل مزيد من الدروس الخصوصية اصبح مرض بل وباء يصيب الصالح والطالح منهم .. فبصرف النظر عن العملية التعليمية فهناك بيوت المعلمين المفتوحة وامانى منتظر تحقيقها فى عيون وضمائر معلمينا وغيرة واحقاد وبورصة غير معلنة لاسعار الدروس يسعى كل منهم لترسيخ قائمته فيها ومن هنا تبدأ الحرب الخفية بين السادة المعلمين ( الجناة) وبين الطلبة ( الضحايا) من حفنة دروس خصوصية

اما عن اولياء الامور فهم اساس المشكلة ..و تقريبا بل حتما هم فى وادى واولادهم فى وادى آخر .. هناك منطقة مفقودة بينهم .. اساسها التنفيض وعدم اللامبالاة بالرغم ان الكل يعلم انهم اهم حاجة فى حياة الاسرة .. ولكن معالجة الامور بينهم اصبحت تحل بالمادة المسيطرة على عقولهم .. مع اسقاط التعامل المباشر مع اولادهم كحل من حساباتهم وبالتالى عدم وجود لغة مشتركة بين اولياء الامور والابناء فتزداد الشروخ عمقا وهما وغما ... ( حدوتة مصرية )

اشكرك .. ومعذرة لطول الرد

وميض ابتسامة يقول...

عزيزى لحظة تأمل

يسعدنى دائما مشاركتك كصديق دائم كما تعودنا منك
اما عن منظومة التعليم التى تبدأ بخطة سنوية مفضوحة من بعض السادة المعلمين بالتوقف عن التدريس بالفصل او الشرح الناقص للمادة التعليمية من اجل مزيد من الدروس الخصوصية ووقوع السادة اولياء الامور فى الشباك المنصوبة بلا وعى او تقدير للامور وبالتالى الاستسلام التام لهذا التكتيك المدروس وتسليم الضحايا بلا قيد او شرط للسادة المعلمين ..

البدايات يا صديقى والاصرار عليها هى اساس وصلب الموضوع .. احنا عندنا نسبة لا يستهان بها من الطلبة الغير مؤسسين اصلا من البداية فماذا تنتظر منهم او من اولياء امورهم المتسببين بالدرجة الاولى فى هذا الجرم

مرة اخرى شكرا ورأيك يهمنى

وميض ابتسامة يقول...

عزيزى mohamed ghalia

كان يسعدنى جدا التعرف عليك ولكن الجيات اكثر من الريحات وان شاء الله نتقابل قريبا بأذن الله

واشكرك كثيرا على ذوقك

سراج يقول...

أكاد أُجزم أن العائلة هي السبب - وإن كان المعلم مقصراً - لكن ذلك لا يعفيها من مسؤوليتها في مسايرة أولادها في كل ما يشاؤون، وكأنها إن قصرت في عدم تلبية طلبه في تخصيص مدرس خصوصي فستكون مقصرة تجاهه
المعلم لا يستطيع أن يحارب التلميذ المجد حتى النهاية.. هذا ما أراه .. تحياتي

يا مراكبي يقول...

موضوع معقد للغاية

ففي الحالة المثالية التي من المفترض أن يكون التعليم عليها: لا حاجة أبدا للدروس الخصوصية بالطبع

وهذه الحالة المثالية قد تجدها في المدراس التي تعني بتعليم الطلاب بالشكل الجيد فلا يحتاجون لأي مساعدات من خارج المدرسة .. وهذا متحقق في مصر بنسبة ضئيلة جدا .. ومتحقق خارج مصر بنسب عالية جدا .. إلا في الدول الأكثر تخلفا من مصر

ولنعد لأول تعليقي: لأن التعليم في مصر ليس على هذه الصورة المثالية التي وصفتها بعاليه .. ولأن اللي إيده في المياة مش زي اللي إيده في النار .. ستظل الدروس الخصوصية في مصر مستمرة وشاهدة على فشل وتدهور النظام التعليمي المصري

معتز شاهين - باحث تربوي يقول...

بجد معاك حق في حاجات كتيرة اتفرضت علينا من المجتمع واحنا اخدنا بها كمسلمات لابد منها

فعلا محتاجين وقفة ومنكنش إمعات

وأدعوك لزيارة مدونتي والتواصل

أ / أحمد عبد المنعم يقول...

بسم الله الرحمن الرحيم
الأخ الفاضل : وميض ابتسامة
موضوعك يستحق التعليق لذا سأعود إن شاء الله لكن
أدعوك الآن لزيارة مدونتى ( أمــــى)
لمشاهدة هديتى لأمى فى يوم الأم

وميض ابتسامة يقول...

العزيزة مهندسة سراج

قد اتفق معك فى اهمية دور الاسرة فى المتابعة المستمرة وكذلك فى انتصار الطالب المجد بصورة أو بأخرى على محاولات زجه فى طابور الدروس الخصوصية ولكن خوف الاسرة المستمر على مستقبل اولادهم يجعلهم يتصورون انهم مقصرين فى حقهم وبالتالى يكونوا عامل مساعد للمدرسين بصرف النظر عن كون اولادهم من المتفوقين من عدمه
اذن فالمشكلة متعددة الاطراف ولابد لكل طرف من وقفة ليلتقط بها انفاسه من هذا السباق الرهيب حتى يرى انه فقط يعدو ....!!

وميض ابتسامة يقول...

عزيزى الفاضل

لاشك ان تدهور العملية التعليمية فى مصر هو ناتج عن تدهور المنظومة التعليمية بصفة عامة....!!
ولاعجب ان تنفرد بعض المدارس باهظة المصاريف وهى قليلة كما ذكرت بمنظومة تعليمية متكاملة .. تبدأ من علاقة المدرس فى الفصل بالتلميذ.. وأولياء الامور بالمدرسة
والسؤال المحير .. متى ستتكاتف الجهود المخلصة من اجل الاجيال القادمة والتى تعبر عن رجالات ونساء مصر والمستقبل القريب والبعيد معا؟
تحياتى وشكرا للمشاركة الفعالة

وميض ابتسامة يقول...

عزيزى معتز شاهين

اهلا بك صديقا صاحب رأى ومشورة ومشاركة .. وبالرغم من كونك مدرسا فأنت ترى ان هناك خللا ما فى مسيرة المنظومة التعليمية واضيف وفى تناول مشاكلها داخل الاسرة ..
الحلول الممكنة فى الوقت الحالى ان تكون هناك رقابة جادة على سلوكيات المعلمين والمعلمات داخل الفصول ومراقبة مدى جدية التعليم والشرح داخل الفصل .. وهذا الدور لن تقوم به الوزارة وحدها بل سيتابعه اولياء الامور الذين سيكون لهم دور هام وهادف فى مراقبة هذا النظام من خلال اجتماعات دورية ذات قرارات سيادية تحاسب المقصر

قد اكون مبالغا ولكن هذا مجرد حل

شكرا لمشاركتك

عاشقه الاحزان يقول...

السلام عليكم ورحمة الله وبركاته
بجد مدونتك جميله وهادفه الى الواقع اللى بنعيش فيه
أهلا بكم معنا في حلم من أحلامنا ويوم من نفسنا نعيشه ضمن أيامنا

هو مش بس حلم لكن ممكن يكون حقيقة بايدنا ومساعده اولي الامر فينا لو حسوا بينا

جالي اكتئاب وبوادر حاله نفسيه بقي دي امه محمد نبي الرحمه والانسانيه

وأولياء الامور اللي صعبنين علي من الدروس الخصوصيه

بجد موضوع أكتر من رائع
تقبل تحياتى

سومه...مجنونه فى بلد عاقل يقول...

اتفضل المعاكس
شوف يا سيدى معندناش مانع ان الطالب يذاكر ويجتهد بس لازن قبل ما يذاكر يفهم هو بيذاكر ايه يعنى ميبقاش بيحفظ زى الحمار عمال على بطال ومش عارف هو بيحفظ ايه
المدرسه مش المدينه الفاضله المدرسه قطعه من مصر فيها كل الانواع فئه اللى معندهمش ضمير وفئه المحترمين اصحاب الضمائر وفئه اللى بيحاول بس مستواه ميرقاش لانه يبقى مدرس
اذا الطفل او الطالب وجد المحترمين اصحاب الضمائر الشاطرين حياخد دروس ليه؟؟
لكن اذا صادفه المدرس الفاشل اللى بيشرح وهو معندهوش الموهبه يبقى المدرس نفسه عاوز ياخد درس ازاى يوصل المعلومه للطلبه
اما اذا صادفه واحد معندوش ضمير يدخل رجل على رجل ويشرب سجاير ويشتم ويهزق وميشرحش ويقولك دروس
فاعذر الاهل والطلبه لان لازم ابنهم يفهم هو بياخد ايه بالظبط
نروح للمدرسين بقى
عديم الضمير الوزاره ممكن تحلها بالرقابه يعنى لو مشيته بالعصايه والعقاب حيخاف و حيبقى ميه ميه
المدرس ضعيف المستوى لازم يقوى نفسه والوزاره كمان تقويه
اما اللى عنده ضمير وشاطر فدا ربنا حيديله بركه عشان اتقان عمله دا
بس يا سيدى متظلمش الناس مش كل الناس بتاخد دروس عشان الاستقصاد وخد بالك انت ممكن تقعد مع مدرس يشرح وانت تتنح متفهمش وممكن تقعد مع مدرس وانت فاهم كويس منه
برا بقى اللى اعرفه ان الطالب من حقه اختيار المدرس وعلى المدرس اللى معليهوش طلب يا يزود مستواه يا يسيب المهنه خالص

Habiba يقول...

الغيبه طالت
بلاش كسل
امممممممممممم

وميض ابتسامة يقول...

عزيزى احمد عبد المنعم

اولا مبروك حصولك على المعلم المثالى على مستوى محافظتك .. واتمنى ان ينولها كل المعلمين .. واما عن اهدائك اياها لروح والدتك رحمها الله فهذا تقدير من نوع آخر
اشكرك لمشاركتك واتمنى سماع رأيك فى مشكلة الدروس الخصوصية

وميض ابتسامة يقول...

عزيزتى عاشقة الاحزان

اسعدنى مشاركتك الرقيقة وكلاماتك المعبرة عن موضوع النقاش .. واتمنى الا تحزنى مجددا .. فالحياة لا تسير على وتيرة واحدة .. ولعلك تصبحين قريبا عاشقة الافراح والابتسام
مرة ثانية شكرا لاطرائك وذوقك

وميض ابتسامة يقول...

عزيزتى سومة .. مجنونة فى بلد عاقل

لاشك ان كل ما تم طرحه فى مشاركتك معنا برأيك محل تقدير واحترام .. ولعلنا لا نختلف فى مدى تأثير هذه السلبيات على منظومة التعليم بأسرها .. ولكن وبالرغم من اتفاقى معك ان المدرسة ليست الا مؤسسة وقطعة من ارض مصر الا ان رياح التغيير والرغبة فى الافضل ستظل دائما شعارا لاصحاب الضمائر والمبادئ اردنا ام لم نرد ...
قد نختلف فى تناولنا لجوانب الموضوع ولكن بالتأكيد نتفق على وجود السلبيات فى كل مرحلة بداية من المدرسة ومرورا بالبيت واولا واخيرا ابنائنا الطلبة التائهون بين هذا وذاك
لاشك ان الطالب الذى يحفظ ولا يفهم قد صعبت عليه طريقة الفهم فأختصر الطريق حافظا .. ومهما حاولت ان تقنعينى ان هناك طالب حمار فلن اقتنع فالمشكلة تكمن دائما فى موصل المعلومة بدليل وجود مدارس لذوى القدرات الخاصة حيث ينزل المعلم لاقصى درجات التبسط فى توصيل المعلومة .. وقبل هذا وذاك وعلى درجة عالية من الاهمية هو مدى قدرة المدرس فى السيطرة على عقول وقلوب تلاميذه حتى يحبون المادة المطروحة
فأنا اعرف وانت كذلك ان هناك حصص غم ونكد وأخرى ينتظرها الجميع بفارغ الصبر .. وهذا يقوذنا فى النهاية الى ضرورة تأهيل ومراقبة المعلمين وتدريبهم بجدية على ان يكونوا معلمين على اعلى درجة من الكفاءة علما وخلقا

اسعدنى مشاركتك واهلا بك صديقة دائمة

وميض ابتسامة يقول...

الابنة العزيزة حبيبة

ازيك وعاملة ايه؟

المسألة مش مسألة كسل قد ماهى مدى اقتناعى بالموضوع المطروح للمناقشة
هناك موضوعات عديدة لم تأخذ جواز مرور بعد من وجهة نظرى .. ولذلك فأنا افضل الانتظار حتى اقتنع تماما بجدواها ومدى افادتها للجميع

تمنياتى بنجاح باهر بأذن الله

فاطمة يقول...

بصراحه انا عاجبانى فكرة طرح الموضوع ده في عالم التدوين وطلبك للراى وانا معاك ان الموضوع زاد اوى بس بصراحه هو ضرورى بس مش فى كل المواد انا نفسى ان المدرسه ترجع تانى تفيد الطلبه ومش تخليهم يحتاجوا دروس تحياتى وتقبل مرورى

احساس لسه حى يقول...

عزيزتى

شوفى الموضوع صعب لاب عاوز ابنه يتفوق

وصعب لابناء فى وسط تعليم بايظ

واكيد فى ناس لحد دلوقتى مش بيدوا لاولادهم درس خصوصى

هما بياكلوهم بالعافية

بس القليل منهم بينجح ويتفوق

لان مش مفروض وطبيعى ان الغلبان يكون عبقرى

تحياتى

سلام

salma mohamed يقول...

في انتظار جديدكم ان شاء الله.

وميض ابتسامة يقول...

عزيزتى فاطمة

زى انت ماقلت الموضوع محتاج حلول جذرية .. محتاج تحديد مجرد تحديد للمادة المطلوب درس فيها .. وياريت يكون عند الطلبة من الشجاعة ان يطلبوا من معلم المادة بالمدرسة اعادة شرحها ومن الجائز ان يقوم بذلك وينتهى الامر
هذا بالاضافة لضرورة حرص الطلبة على حصتهم واجبار المدرس بحسن استماعهم لشرح مادته بأسهاب ولا مانع من طلب الاعادة لو تعذر الفهم .. ده لو امكن طبعا
عموما نورتينا برأيك واهلا بك صديقة

وميض ابتسامة يقول...

عزيزتى احساس لسة حى

اعتقد انك جبت من الآخر .. تعليم بايظ واب عايز يأكل عياله .والدنيا كلها بايظة
وعليه .. فالقضية منتهية وعليها السلام ...

اهلا بك صديقة ومشاركة فى قضية الدروس الخصوصية

وميض ابتسامة يقول...

عزيزتى سلمى

اشكرك لاهتمامك .. وادعى لى ان اكون عند حسن ظنك وابدأ فى الكتابة عن موضوع جديد

تحياتى

Ryme يقول...

أي نعم فانا من الناس التي كانت ترفض مجرد الحديث عن الدروس الخصوصية ولكن.....الان فانا في اشد الحاجة الى من سيساعد ولدي في فهم المنهج الغبي و المشفر بالنسبة للكل حتى ولو كنا متعلمين و مثقفين غير اننا أصبح وقتنا كله مكرس في العمل مش للتعليم فقط للأكل والشرب وان أمكن الرفاهية وهذاحتمال.هذا من ناحيه الناحيه الأخرى المدرس اللي بيدرس بضمير في الفصل بيتقال عنه" أهبل و عبيط"لأنه حرم نفسه من نعمة الدروس!!!
ومادراك ماهي هذه النعمة أنزل و اتمشى شوية في المهندسين واتفرج على السنترات أشكال و ألوانو أقف وسط المدرسين واسمع المنافسات و الخناقات بسبب ان ده أخذ عيال ده.....ولما أحب أرحم أولادي من الدروس و قرفها و من امتحانات الثانوية العامةوبهدلتهاالحل بسيط وأبسط مما تتخيل الفلوس اللي هادفعها في الدروس هه هه هه أحطها في مدرسة أمريكيةالتي أصبحت كالوباء في مصر ليه يعني (أشتري الشهادت لأبنك بالفلوس ومش مشكلة لو طلع حم____________ار؟؟؟؟؟؟الناس أصبحت تقطع في نفسها من أجل أولادهاوأنا أحد هذه الناس فيا ترى أمشي مع القطيع والا ؟؟؟؟؟؟؟؟؟؟؟؟؟؟؟؟؟؟؟؟؟؟

وميض ابتسامة يقول...

عزيزتى ريم

انا طبعا معاكى فى ان المدرسين قاطعوا التدريس فى الفصل من اجل مزيد من الضغوط على الطلبة وبالتالى اولياء الامور .. ونظرا لان السادة الافذاذ المسئولين عن المناهج قد قرروا ان يضيفوا لصغارنا كل ما يمكن من تعجيز وارهاب فكرى وتعليمى .. فنحن ليس امامنا الا فتح بيوتنا وجيوبنا لاستقبال الدروس الخصوصية والا فسوف نتأخر على الركب ولقد اعذر من انذر ولكن انا شايف انه لو كانت الحالة المادية تسمح فأيه المانع ان ابنى يبقى زى غيره من المتأمركين ويدخل مدرسة من اياهم واهو كله تعليم والسلام ..

شكرا كثيرا لمشاركتك واهلا بك صديقة وزميلة جديدة فى دنيا المدونات

نـــــــــــــور يقول...

ازى حضرتك
واحشنى جدااااا ومابتسألش عنى ممممم

الريدر عندى قرا بوست بس دخلت لقيت القديم هو حضرتك شلته ولا ايه؟!!

يارب تكون كويس وبخير

الازهرى يقول...

استاذى العزيز
اتشرف بدعوتك لزياتى فانا احتاج الى رأى كل مفكر رائع مثلك فى مدونتى

وميض ابتسامة يقول...

عزيزتى نور

الفترة الحالية انا مشغول للغاية وزى ما انت لاحظت انا كنت بعمل محاولات لنزول بوست جديد ولكن يبدوا انى عندى مشكلة فى الصفحة الرئيسية بالمدونة لانها دائمة ما تعطينى error عموما اذا كان عندك حل ياريت تقولى لى عليه

تمنياتى بالتوفيق وشكرا

وميض ابتسامة يقول...

عزيزى الازهرى

طبعا انا مش ح اقدر اتأخر على دعوتك اللى لسة شايفها اليوم فقط وسوف اتوجه من فورى لمدونتك حتى ارى ما هو المطلوب
خالص تحياتى

Plogs يقول...

This is such a nice addition thanks!!!
غلا الروح
شات صوتي
بنت ابوي
شات صوتي
شات الغلا
عرب كول
انحراف كام
عذاب كول
عذاب كام
عذاب كول
شات صوتي
شات مغربي